الخميس، 30 يوليو 2009

انا بيا ألم



الطبع يغلب التطبع



والطبع غلاب



الطبع دائم فى الانسان مايخرجش منه الا لما يموت


قالوا اللى طبعه الصمت أبلغ الناس


قالو الصمت من دهب والكلام من فضه



- يعنى الطبع ده ممكن نقول عليه انه مثلا يعنى حاجه احنا متعوديين عليها...؟!
- يعنى انا لو زعلت يبقى حزنى عامل ازاى ...؟!
- يعنى لما افرح بيبقى فرحى شكله ايه...؟!
- هو انا لو اخدت موقف من حد انا بحبه اوى بيبقى طبعى وقتها ايه...؟!
- فى حد طبعه لما بيتألم مش بيتكلم وبيكتم فى قلبه الكلام مش بيخرجه
ولو حد عزيز عليه اوى جرحه....
مش بيتكلم ممكن يقف قدامه متعجب كتير لكن مش بيقوله انت عملت ايه معايا وتلاقى التانى مش عارف انه عمل حاجه اصلا
وقتها طبعه يحكم عليه بإيه ...؟

- لما يحب حد اوى ويقوله انت حياتى كلها من البدايه للنهايه وفجأه الحد ده يبعد من غير اى سبب ويسيبه ينهار شويه بشويه لحد ما يتحطم خالص وبعدين ..... يرجعله تانى....

طبعه وقتها بقه هيحتم عليه انه يعمل ايه....!
يا ترى الصمت كالعاده والكتمان ولا هيكون ايه وقتها...؟!
.
.
ممكن يكون فى طبع طغى عليه الصمت .... الكلام هجره من زمن.

.
- قلبك هيكون حاسس ايه وانت مش قادر تتكلم وتقول آآآآآآآآآآآآة انا فيا ألم انا بيا غضب انا مالينى الحزن ..
مش قادر تعتب ولا تلوم

مش قادر تسيب دموعك تنزل ماسكها بالعافيه ...حاجه جواك بتكتف الدموع وماتسبهاش تنزل ابدا
حتى مش قادر تشتكى لحد وتحكيله
خايف وانت مع حد بيحبك و بيسألك مالك ..؟!
وانت مش عاوز تتكلم معاه ومش عاوز نظرته تفهم ان انت بيك ألم

مع ان ابلغ لغه .. لغة الصمت .. بس أكيد كلنا بنعانى منها
.
يا ترى انت طبعك الصمت ولا ايه...؟!

الجمعة، 24 يوليو 2009

قال بتحبنى قال ...!!


هو الحب ده طالع حاجه جديده ولا ايه بالظبط
كله بيحب فى بعضه بمناسبه ومن غير
كل يوم الناس تحبنى كده
(( طبعا ما أقصدش انى تامر حسنى ولا حاجه ))



.




اليومين دول الناس بتحب بعض بطريقه غريبه اوى
.
.



ومصطلحات بقه زى ما انت عايز تدل على ان الناطق بيها عاصمه كبيره للحب
صباح الفل يا غالى - عامل ايه يا نور عيونى - وحشتنى يا روح قلبى - فينك يا عمرى - حبيبى وابن حبيبى - see u - take care ya baby

.
هو الحب جاى دلوقت فى الزمان اللى مات فيه الحب واتحول لحجات تانيه غريبه




هو فى ايه ...؟
ايه كميه الحب اللى من غير لازمه دى
هو فى كده ...!
نفسى بقه فى شويه كرهه
عاوز حد يعرف يكرهنى بجد

اه والله بجد
اصل بصراحه زهقت من الحب المزيف



بالزمه مش الكرهه سعتها يبقى احلى ....؟!









يا اللى انت بتحبنى وعارف انى مصدق

انا قلبى على قده صغير ولسه محندق

مافيش والله مكان حتى لكدبه صغيره

ارحمنى بقه انا فى الحب مش قدك



*-*-*-*-*-*-*-*-*-*-*-*-*



مش لاقى كلمه سر أخرج بيها اللى جوايا

مش بحبك كرهتك مش عاوزك معايا

كفايه بقه كدب عليا وتمثيل يا عم

نفسى تمشى تهاجر ترحل عن سمايا



*-*-*-*-*-*-*-*-*-*-*-*

.

.

انا شفت فكره جميله اوى فى مدونه مش فاكر اسمها دلوقت

بس الفكره كويسه وعجبتنى

وهى ان فى نهايه كل موضوع نسيب سؤال

علشان يبقى فى مجال اكبر وأوسع للتعليقات

والنقاش يبقى فى نطاق تفكير صاحب الموضوع

علشان كتير بكتب مواضيع وتتفهم حاجه تانيه

عموما انا هطبق الفكره دى عندى ويا رب تنفع


ايهم أرحم عندك ... ان يكرهك من تحبه ... أم ان يحبك حب مزيف ....؟!



الخميس، 16 يوليو 2009

هو انت ليك قد ايه فى قلبى...؟!





ما زال الهوى هو قيدى الوحيد

ما زال قلبى ينبض بحبها من جديد

ما زال بعدى عنها هو السبب الذى يجعلنى اضعف

مازال حنينى اليها هو ما يجعلنى كالمستغيث اهتف

ما زال شوقى لها يجتذبنى فقط نحوها

ما زال غرامى بها لا يبصرنى غيرها

ما زالت رغبتى فى امتلاكها تمنينى بالعوده اليها

ما زالت دمعاتى حين اذكر بعدها تصرعنى امام عينيها

ما زالت مشاعرى تكشف خبايا نفسى التى لطالما خبأتها عنها

ما زالت احاسيسى تكره البعد عنها

وتخاف بشدة قربى منها

هكذا هى وحدتى حين اتذكر الماضى تأخذنى لمراسم الفرح التى اتمناها


ما زالت اشواقى تبكى على فراقى وتقسم الا احب غيرها ا و سواها

ما زلت انا اغرق فى وهم الهنا.. ذاك الذى اقنعت نفسى خطأً انه فى حبها نجاتى

كثيراً ما عانيت فى حبها سجين.... نعم كنت سجينها ...قتيل ...

نعم كنت قتيلها كثيراً ما شعرت بالخوف من حبها

لم اكن اتوقع خيانتها - ولكنى كنت اتوقع فقط خيانة من حولها

كنت رغم كل حبى لها اعانى ....

كنت ارى حبى لها بلا معانى

كنت اضحى واقدم القرابين وانا اعلم جيداُ انى سأكون حتماً من الهالكين

فكل من رأنى فى حبها عاتبنى على اخلاصى وقال لى ستأتى يوماً تبكى وانت تقاسى

لا اعلم ..ربما كانو صادقين ..

.رغم كل الجرح والانين ...

اشكك فيهم وانا بهذا خير العاملين

كثيراً ما تغاضيت عن جمود مشاعرها ... عن تحجر قلبها ... عن طمع احلامها

فيها كل تلك الصفات . وانا اراها اجمل وارق الجميلات ... اراا فى قلبى اميره الاميرات

لا اعلم كيف كانت خطواتى ترى ...اذ انها قاضتنى الى ان اكون فى وسط الثرى

اقنعت نفسى اننى املك منها وفيها كل شئ ...وانا اعلم اننى لست بمالك منها اى شئ

بها كل هذا الصفات ...وانا اسميها اجمل وارق النساء

انام واصحى على ذكر حبها فى الصبح والمساء

ولكنى للأسف ما زال الهوى قيدى الوحيد

دلونى ماذا افعل فيما انا فيه ... فرب كلمات تخفف عنى ما اعانيه


قالها على خلاف

وانا وقعت عليها بالاعجاب

دايما انت بتحسن الاختيار
انا مبسوط اوى ان انت صاحبى بجد
ربنا يديم المحبه بينا
انا بعتز بيك اوى يا على ونفسى ما تخرجش من الاوضه بتاعتى ريحتك وقصاقيصك الكتير اللى فى الدرج
ولا تخرج من محفظتى صورتك
ولا انسى ذكرياتى معاك
ولا ننسى الخناقات والقمصات اللى كانت بتحصل بينا
ولا تنسى الجوبات اللى كنا بنكتبها مع بعض

ولا مجال الحورات اللى بيدور بينا وكأنه احنا الاتنين قاعدين على كراسى اعترافات
ولا حتى ننسى ايام لما كنت بتصحينى الفجر علشان مش عارف ايه كده ...!
وزى ما ذكر شلاطه

عن الصديق اللي الرسول صلى الله عليه وسلم قال عليه
المرء على دين خليله
عن الصديق اللي هو حامل المسك
مش نافخ الكير
عن الصديق اللي قال عليه شوقي:
عن المرء لاتسل وسل عن قرينه
فكل قرين بالمقارن يقتضي
.

.
علشان نعيش ونكبر ونفتكر انا وانت ( AHMED& LOSHA )

الخميس، 9 يوليو 2009

نقطه سوداء قد محوتها







كما هى من يوم ان رئيتها.....


تتباهى بجمالها وتتبخطر عندما ترى احدا يهتم بها ويلقى عليها بمحاسن الكلمات.... فمنذ ان عرفتها وهى جميله تتباهى بنفسها حسناء ..لا تخشى احدا من جنسها فهى لم يسبقها احدا جمالا فلا تنظر الى فتى الا وقال انها نظرت لى ويشك انها تحبه ....حتى جاء دورى.. عندها فى انقاذها من ايدى الذئاب الذين كادوا ان يلغن فيها لولا انها صرخت فسمعتها فأتيتها مسرعا.. ففروا الذئاب خائفين من ان تعرفهم وأعرفهم وقالت لى انت منقذى انت حبيبى .. انت .. وانت ...وأنت...ووقع على حدسى كلامها وكأننى اتمناه منها فكلمه حبيبى كنت يوما اتمناها منها حرفا اتمناها منها همسا او نظره واذا بى اصدق ما قيل لى من كلام معسول خارج من فم هو بيت للصدق كما ظننت..ولم ادرى ما جزائى لأنقاذها احقا تملك هى هذا وذاك وهذا وانا ...لا انا لا

انا لا اعطى مفاتيح قلبى الا لمن يصون ...فشيم اهل الوفاء ليس بالغدرفأنتى غدرتى ولم تصارحينى فى بادىء الامرفليس لكى عندى غير عتاب وفراق ..

فأذهبى فمثلك لا يستطيع ان يعكر صفو حياتى وان يغير شكل بسماتى.

ففى مدونتى اناس والله لو تعرفيهم لتمنيتى انت تكونى منهم..

فلهم روحا صادقه ..غيرك تماما

وأعلم انك ستقرأين كلامى

فلا تعذرينى فأنا اقصد

ولا تتشفعى لى فأنا اقصد

ولا تغفرى لى فأنا اقصد

مثلما يوما انتى قصدتى


.


.



وأترك حبها فى غير بغض


وذاك لكثره الشركاء فيه


فإذا وقع الذباب على طعام


رفعت يدى ونفسى تشتهيه

الأربعاء، 8 يوليو 2009

هى دى اخرتها....؟!






اه لو تعرف اللى انا فيه
وازاى قلبى عاش لياليه

مش لاقى حضن يدفيه

ولا يحس معاه بامان

غلطة قلبى ان انا حبيتها

سكنتها قلبى وبقى بيتها

والحب اللى انا عشته معاها

راح يا قلبى كأنه ما كان

هوه جزاتى عشان حبيتها

بقى يعنى هيه دى آخرتها

بعد ما كنت بخاف دمعتها

تنزل على خدها وتبان

واهى دلوقتى كمان فايتانى

عايشة بقلب وحب انانى

وآه لو كانت هيه مكانى

كانت حست بالحرمان

بعدك والله هعيش واتحمل

وامشى المشوار تانى واكمل

منك والله القلب اتعلم

ازاى هقدر عالأحزان

*******

إن فاتك اللى تحبه قدر انه مات
إترك سبيله ولا تندم على اللى فات
ده الصقر يعلى فى الجو فوووووق
يموت من الجوع ولا ينزل على الرمات

السبت، 4 يوليو 2009

ضـــــ:) القمر:( ـــــــــى






عرفت النهارده بنت أموره



سنها عدى العشرين ولسه صغيوره


قالتلى تعالى نتصور صوره



قلتلها وقلبى فرحان وهى مسروره



نتصورللذكرى والصداقه يا شطوره



ويا رب يرجعلك بالسلامه تموره



علشان يحبك يا اجمل فظوره



يا اللى صورتك فى قلبه محفوره



اللى خلى الحزن عنك منطقه محظوره



عمره مايسيبك ليها بسهوله



يا اجمل وأرق عصفوره



يا اللى عندى وعند تموره



دايما فى قلبنا هتبقى الاولى



هو حبيب وانا صاحب ورجوله



اسمع همسك وأقول مش معقوله



فى حد بالدنيا



مايحبش شوشو العسوله


*******

:)




أضف يا قلمى صديقه جديده فى عالمى الخاص



أكن لها الحب والاحترام



والصدق بألتزام



وأكتب علينا الفراق حرام



وأكتب كمان احسن سلام



من غير حتى اى كلام



وخلى السيم اللى بينا المشمش اللى كنت مفكره شمام



:)

جرب كده...!









مره جربت حاجه جميله اوى ونجحت معايا




كنت فى يوم حاسس بحاجه احنا بنسميها ( مخنوق اوى )


مخنوق دى يعنى فى الوقت اللى انا فيه بكون مش بعمل حاجه خالص ومش بكلم حد ومش شايف ناس قدامى وانا بس اللى موجود ومش فى اى حاجه اتسلى بيها ولا فى اصلا حاجه فى عقلى بفكر فيها انى انوى اعملها او بفتكر حاجه لالالا بكون متوقف عن التفكير وعن كل حاجه


قاعد بس فى البيت انام هنا واقوم من هنا اقعد هنا وامشى شويه وانام شويه كده يعنى.




فى يوم بقه الحاله دى كنت عايشها وفكرت اعمل حاجه جميله اوى


اولا بمجرد ان الفكره دخلت دماغى انا حسيت براحه كبيره اوى


وبدأت انفذها






((اللهم اغفر لى ذنبى - ووسع لى فى دارى - وبارك لى فى رزقى))


(( بسم الله - اللهم اجعلنا من التوابيين المتطهريين ))






وبدأت فى الوضوء وبعد ان فرغت منه


فرشت المصليه


وصليت لله


واثناء سجودى


دعيت ربنا باللى انا كنت عاوزه


دعيت ربنا وقلت (( دبرنى يا رب انا مش عارف اعمل لنفسى اى حاجه مش عارف ارتب نفسى يا رب نظملى حياتى وابعد عنى الشيطان - اللهم لا يأتى بالحسنات الا انت ولا يذهب بالسيئات الا انت , ولا حول ولا قوله الا بالله العلى العظيم , اللهم ألطف بنا فيما جرت به المقادير , اللهم ادفع عنا إنك على كل شىء قدير )) .




وتخيلوا بقه معايا اللى انا كنت فيه:-* الدنيا فعلا والله كانت ضيقه اوى عليا مش عارف مالى او ليه انا مخنوق على الاخر


وفجأه


كوووووووووول شىء انتهى


بمجرد ما خلصت التجربه دى حاسس انى غيرت جلد وغيرت رئتين وغيرت قلب وغيرت كل حاجه جسمى بقه فى حاله راحه طبيعيه تامه


الدنيا نورت والله او انا شفتها منوره اوى وجرس الباب رن وفتحت الباب لقيت اعز انسان صاحبته فى حياتى وحاكيتله الموضوع وفرحلى جدا ودعالى ان ربنا يدمها عليا نعمه ويا رب يدمها عليا نعمه




بجد الصلاه اهم شىء واحلى شىء واكتر شىء له لغز كبير فى حياتنا ( سبحان الله )




اول لما تصحى من النوم بمجرد انك تفتح عينك اتوضى وصلى لله ساعتها ربنا هيوضع غناك فى قلبك اما لو ما عملتش كده وفكرت فى الشؤن الدنياويه والشغل والاولاد والمدام والحجات دى ربنا بيوضع لك فقرك امام عينيك


الصلاه اولا فى كل شىء


يا رب المسلمين اللى عايشين فى الدنيا كلهم يصلوا قولوا امين


نفسى كده ماحدش يسألنى ويقولى


انت اسمك ايه اقوله احمد يقولى انت بتصلى ...؟!


عاوزين لما نعرف ان ده اسمه احمد يبقى ده مسلم يبقى ده بيصلى يبقى ده حبيب النبى يبقى ده الرسول هيشفعله يبقى ده هيدخل الجنه يبقى ده فعلا انسان موجود بشرف وفخر


يبقى مش هيبقى فى حد مسلم يتقال عليه انسان فاسد


هتبقى بتخاف اوى من ربنا


فبالتالى مش هتخاف من حد تانى فى الدنيا خلقه ربنا


هتصلى يعنى هتقرأ قران كتير يعنى بتتكلم كلام ربنا اللى بلغه لسيدنا محمد يعنى كلام صحيح وكلام جميل جدا


فبالتالى مش هتقدر تلفظ لفظ او تتكلم فى حوار مش جميل او حوار مش جدى


يعنى هتبقى راجل اوى مش بتقول حاجه غلط مش بتخاف من اى حد الا ربك


بتعامل الناس كويس جدا لانك مرتاح نفسيا فبالتالى هتلاقيهم بيعاملوك كويس جدا


ولو كان اول همك فى الدنيا انه ربنا يبقى راضى عنك عمر ما هتلاقى حاجه فى الدنيا بتشغل دماغك او بتجعلك مهموم لانه انت جعلت اكبر همومك عند رب العالمين فاكيد مش هتبقى فى هموم اكبر من كده


ياااا انا لو فضلت اتكلم لحد لما اخلص مساحه المدونه كلها مش هخلص (( هو المدونه ليها مساحه ماشى ماشى ))






وعلى فكره يا جماعه ربنا غفور رحيم


((ده اللى خلق النار الرحمن الرحيم ))