وبعد غياب ما تمنيت ابدا ان يطول على هذه الصديقه الوفيه التى لم تشكو منى قط .ها انا ذا اعود اليها مجددا وانا ملىء بالنشاط والحيويه والرغبه فى إفشاء حالاتى كما كنت افعل من قبل واستمتع .
.
معايا النهارده إعتذار ... وخبر ... وبشرى ساره ... وترجمه مشاعر احسها دوما
إعتذار لكل اللى إفتكرونى وسألوا عليا وحسسونى انى حتى لو مش موجود بحضورى انا حاضر بينهم بالسيره الطيبه والود والتقدير اسف جدا يا جماعه انى ما كنتش بتابع وانشاء الله هتابع وحاول انشاء الله انى اشوف كل اللى فاتنى يعنى ملحوقه بإذن الله .
خبر سعيد جدا عرفت من كام يوم واحد صاحبى على حقيقته اللى مش كويسه وعرفت انى كنت غلطان فى حق نفسى لما عرفته لانه طعنى فى ظهرى وانا بقول خبر سعيد جدا علشان الحمد لله انى عرفته فى الوقت المناسب علشان كان ممكن لو دخل بيتى كان ينظر لزوجتى مستقبلا ومش ده نوع الخيانه اللى عمله معايا ولكن الشيطان مش بيستأذن
ووقتها كان هيبقى خبر تعيس جدا ولكن الحمد لله انى خسرته وانا سعيد جدا بكده .
وهذه محاوله فى اخذ الامور ببساطه وعدم تعقيدها اوأخذها على محمل الخيانه والغضب والكئابه والحجات دى .. ما علينا
بشرى ساره ... حبيت تكونوا من اول الناس اللى تعرفوا البشرى الساره دى .. ابويا ربنا يجيبه بالسلامه من بلد النبى وافق اخيرا انه اول لما ينزل اجازه يخطبلى وده انشاء الله خلال السنه دى بإذن الله وبكده طبعا طالما فيه هدف إذن فيه محاوله للوصول اليه وده طبعا هيتم بالتعب الذيذ المرغوب فيه اللى هو الاجتهاد الشديد فى العمل والبحث عن اكثر من عمل علشان الوالد ربنا يجيبه بالسلامه لما يوصل يلاقى راجل معاه فلوس ويقدر يخطب له وهو مطمئن عليه وواثق ان اللى هيعمله صح وفى مصلحتى .
ترجمه مشاعر احسها دوما
بالرغم من الفوضى التى مررت بها
وبالرغم من المتاعب التى اعاني منها
والصبر الذى احتوانى كثيرا
والارهاق الذى كاد ان يمزق مشاعرى
اشعر بدقات قلبى الساكن بين اضلعك
هذه المضغه التى غابت عنى كثيرا
اليوم استبشرت خيرا انها مصونه لى
اليوم ايقنت ان القدر حافظ عليها من أجلى
من اجل يوم كم تمنيت ان يأتى
وان اعيشه بكل ذره تسكننى
فمن يوم ان حلمت بكونها لى
وان انتظر هناك على الشط الاخر للحظ
انظر للماء ليتنى أجد خيال وجهك المريح
فأنظر له وأمتع عينى .. وأتأملك
فانتى قد اقحمتينى فى مدينه ليست بمدينتى
ولم اعد اقوى على جمع شتات مشاعرى
فانا دونك وحيد فى عالم ليس لى وجود به
فكيف لى ان اعود دون حسنائى
فكيف لى ان لا اضمك
ان لا المسك
ان لا اقبلك على جبينك وعلى يدك
وكيف لى ان لا اهمس فى اذنك .. احبك
كم اشتقت اليها كلمه .. حرف ... همس
أميرتى ..
سوف انتظرك فأنتظرينى على ضفاف النهر
ولا تتلاشى حتى اعود
فوعد منى ان لا اغيب
وعند عودتى
وعد منى انى لن اغيب
