الخميس، 26 نوفمبر، 2009

اعز الناس



أعز الناس
على طول الحياة نقابل ناس .. ونعرف ناس .. ونرتاح ويا ناس عن ناس
وبيدور الزمن بينا .. يغير لون ليالينا وبنتوه بين الزحام والناس ..
ويمكن ننسى كل الناس .. ولا ننسى حبايبنا أعز الناس ..
سنين وسنين تفوت ما نحس بوجودها ولا وجودنا .
ولحظة حب عشناها نعيش العمر تسعدنا
ومين ينسى ومين يقدر فى يوم ينسى ؟ شعاع أول شرارة حب
ونظره من بعيد لبعيد تقول حبيت .. ورمش يقول غلبني الحب غلبنى
ومين ينسى .. ومين يقدر في يوم ينسى .. ليالي الشوق ولا نارها وحلاوتها ..
ولا أول سلام بالإيد ..
ولا المواعيد ولهفتها
ولا ننسى ولا نقدر في يوم ننسى .. حبايبنا أعز الناس حبايبنا
حبيب قلبي وروح قلبي حياة قلبي ..
يا أغلى الناس يا أحلى الناس يا كل الناس
لسه مشوار الحياة شايل لنا وقفات ..
معالم فى طريق الحب أحلى كتير .. من اللي فات من اللي فات


كلمات مجدى العمروسى
الحان بليغ حمدى
غناء عبد الحليم حافظ

السبت، 21 نوفمبر، 2009

غدرت ليه بيا...؟




الكلام مالهوش نهايه


والحكايه من البدايه


ان قلبى كان معاه


وهو دايما مش معايا


وهى دى اخر الحكايه


اللى كانت من البدايه


الخيانه من ماضيها


والغدر باين من عنيها


سؤال واحد


اسأله ليها


قربتينى ليه...؟!


علشان تجرح فيا...؟


سقتنى العذاب


بالحب والحنيه


إنسان وليد


الغدر والانانيه...؟!


مايهمنيش قلبك


ومايهمنيش حبك


كل اللى عاوز اعرفه


غدرت ليه بيا...؟




عندما ينزف قلم صديقى احمد عمران

الأحد، 15 نوفمبر، 2009

أغرب شىء على الأطلاق



اغرب حاجه فى الدنيا الحب


ولا اجمل حاجه فى الدنيا الحب

.

تقريبا هو اجمل حاجه فى الدنيا لان اى شىء بنحتاجله وبنحتاج اننا نحسه اوى اكيد بيبقى شىء جميل اوى


ومع ذلك هو اغرب شىء فى الدنيا لان اى شىء جميل العيون بتتعود عليه مش بيبقى له لذه الانبهار قد الشىء الغريب ووقتها الشىء الغريب بيبقى أجمل
.
.

هو : بحبك اوى
هى : وانا كمان يا اكتر اخ حنين فى الدنيا

هو : بحبك يا اختى ويا حبيبتى ويا أمى ويا كل حاجه حلوه فى حياتى

هى : بإستغراب شديد ... ربنا يخليك

هو : معقوله مش فاهمه

طبعا هى بتحاول تستغبى عليه علشان ماينفعش تدخل فى علاقتين مع بعض وكمان هى مش متأكده انها بتحبه بدرجه اكتر من اللى هى بتحبها لحبيبها اللى اختارته

هى : لا مش فاهمه ... ممكن توضع اكتر...؟

هو : مش لاقى حاجه اقولها اكتر من انى مش عاوز ابعد عنك ابدا وأفضل دايما اسعدك وانتى جمبى وعاوزك ليا يا احلى شىء فيا ... بقلك بحبك ... بحبك اكتر من نفسى

هى : انت فاجئتنى بالكلام ده .. انا مش مستوعبه الكلام .. معقوله انت بتحبنى الحب ده

هو : واكتر من اللى انتى متخيلاه كمان .. انتى ما تتصوريش انا قد ايه بثور لما بتكلمينى عن خطيبك .. ببقى عاوز ادخل جواه ونبقى انا وهو واحد علشان احسك وأحضنك اوى وأعرفك اد ايه انا بحبك

هى : اللى انت بتقوله ده ما ينفعش خالص انا عمرى ما حسيت بأى حاجه نحيتك اكتر من انك صديق مميز .. وعمرى ما تخيلت ابدا انك تقولى حاجه زى كده .. انت ايه اللى خلاك تقول كده

هو : اللى خلانى اقول كده انى خلاص مسافر بلدى ومش هينفع اسافر من غير ما تعرفى اللى جوايا .. انا فكرت مليون مره قبل ما اصارحك ولقيت انى لازم اصارحك باللى جوايا لانى خلاص مش قادر اخبى اكتر من كده .. وانتى لازم تفهمى انى خلاص مش قادر اسكت ولا ابطل حبك

هى : سكووووووووت تام

هو : انتى ساكته ليه.. مستغربه انى بحبك وعاوزك ليا

هى : انا مش عارفه اقولك ايه ولا عارفه اعمل ايه .. بص طيب انا هكلمك وقت تانى

هو : ألو ألو

..
... انتهت المكالمه وبسرعه فتحت تليفونها وخرجت الشريحه منه وكسرتها .. وقررت انها تهجره للأبد بالطريقه الوحيده اللى كان بيوصل بيها ليها وبكده هى هجرته احسن ما تستمر معاه فى سبيل رضاه وفى الاخر بارضه هتهجره ووقتها الجرح هيكون جرح صعب اوى ..
.
مين اللى له ذنب فى اللى حصل ...؟
هى مالهاش ذنب فى حاجه علشان هى مش قالتله حبنى للدرجه دى او حبنى من أصله لانها فعلا بتحب وكمان هى شايفه مع ان اللى عملته جارح بس هيكون احسن الوحش وعلشان كده نفذت القرار بسرعه
وهو مالهوش ذنب علشان قلبه مش مستنى يقوله حب مين وما تحبش مين
طيب مين اللى له ذنب فى اللى حصل ..؟
.
.

فعلا اغرب شىء فى الدنيا الحب
.

طلعتلى فجأه
قلبى الخلي فجأه
صوته علي فجأه
والكون حلي فجأه
وانا نفسى متفاجأه
يا نجوم السما اللولى
ردى بقه وقولى
عيونه حنولى
وبالكلام وصفولى
أنـُه خلاص رق
وقلبه ليا دق
وقلبى كان هيصدق
لولا المفاجأه
اللحظه كانت سارقه
وكان فاضل خلاص دقه
ولحقت وقولتله لأ
انا قلبى مش ملكى
ولا كلامى ده ملكى
ولا انت تنفع ملكى
لازم ما أجرحكش
ولازم ما اعرفكش
وانت ما تزعلش
انا ما استحملتش المفاجأه
وقررت انى أجرح
قبل ما اخليه يفرح
وأرجع اقوله أسرح
وتبقى له اكبر مفاجأه

السبت، 14 نوفمبر، 2009

تنويه اد كــــــــــــــــــده


هو المفروض البوست ده يكون قبل البوست اللى انا حذفته بس انا

.

.

للأسف نسيت

.

.

المهم

التدوينه اللى فاتت انا كنت عاملها علشان كان لى صديق قديم مهاجر الى بلاد الفرنجه وكنت عامل له مفاجأه بالبوست اللى اتحذف وطبعا هو لما شافها فرح جدا وكان هدفى منها انه يبقى مبسوط وهو شافها والحمد لله

وانا عملت التدوينه اللى فاتت علشان ما كنتش لاقى طريقه يشوف بيها الصور والحجات دى الا بالطريقه دى فاستغليت مدونتى العزيزه للامر ده

يريت تكون الفكره وصلت علشان فى ناس بتزعل من نشر صور خاصه بصاحب المدونه واصحابه والكلام ده

مع انى شايف انه عادى يعنى

وكل واحد وضميره بقه

ويا ريت حد يفهمنى ازاى اعمل فى المدونه كود بيه ماحدش يقدر يعمل كوبى او باست للتدوينات او للصور انا شفت بوست بيشرح الكلام ده بس ما قدرتش انفذ علشان انا مش بعرف اد كده فى الحجات دى

ليكم احلى واجمل وارق تحيه يا احلى مدونين فى الدنيا

الأربعاء، 11 نوفمبر، 2009

جرح اللى منك



.
.
الله يسماحك
هو صحيح انا غلطان
بس انا مبسوط من غلطى
علشان سعات كتير رد فعل
بيظهر حجات كتير
ومنه بنشوف نوايا كنا احنا بنظنها حجات تانيه
.
.
.
لو كنت مكانى هتعمل ايه...؟!
لما يكون جرحك بإديه...؟!
ويوعد وعد ويخلف بيه ...
ولو كنت مكانى هتعمل ايه...؟!
ما هو اصله يعيش وما يديش.
ولما بيوعد .. ما بيوفيش...
وياريتو عاشرنى وما عرفنيش..
انا عن نفسى مايلزمنيش.
هبعد عنه وهرفض منه . اى كلام
همشى واسيبه لنفسه وروحه وللأيام..
مش يبقى حرام اسهر وينام.
والمطلوب فالاخر اخلص ليه..
ولو كنت مكانى هتعمل ايه...؟
حلمنا كتير..
من غير تفكير..
والحب ما بينا.. كان حب ضمير
قررت قرار .. ابدأ مشوار
وصعب يكون .. قلبى اسير
نصيحه منى .. لكن غصب عنى
كل الكلام من القلب طالع..
يا صاحبى اسمعنى ..
اكره كتير قلبى اللى حبك ؟؟
حب الجنون...؟!
وحب بضمير .. قلب عايشلك
دنيتك علشان يخون..
مع انى عارف مهما تحب الحب على قلبك يهون
احلم وعيش .. وهم ووعد مالهاش عدد
وهم عهود بحب دايم للأبد ..
ندمت فعلا.. على انى كنت اسميك ملاك
وكرهت قلبى اللى كان حابب هواك..
وظلمت نفسى وسنين حنان ضاعت معاك.
وبعد ده كله انا هخلص ليه...؟!
طيب لو كنتوا مكانى هتعملوا ايه..؟!

الخميس، 5 نوفمبر، 2009

مشاعر محفوظه ولكن لم يأتِ عليها التراب



دائمه هى الذكريات
دائمه هى حتى الممات

ولن ننسى ما مر وفات

من ضحك وجد وآهات

فستبقى هى فى الوجدان

وستكون دائما فى الحسبان

لن يمسها ابدا داء النسيان

وسيخرج منا اليها الحنان

فمن خرج من ثيابُه

لن يأتى يوم إيابُه

وسيعيش فى سرابُه

ويدفن هبائاً فى ترابُه

.

.



زماااااااان كان بينا حب





افتكرت ايام زمان ايام ما كان فيه بينا حكايه.. ايام ما كنا اول لما نشوف بعض كنا بنبتسم وجوانا الفرحه عاوزه تاخدنا وتطير .. ما حستش بالحنين اوى كده قبل ما افتكر ايامنا سوا .. بسرعه سيبت اللى فى ايدى وجريت على الاسكتش اشوف صورتك فى كل كلمه كتبتيها وافضل حاضن الورده الحمرا بتاعتك وقت كبير خايف انها تدبل وبشبع عينى منها واقول يا ريت ترجعى تانى تفردى ورقك وتنشرى عطرك فى مجالى .

(( مستحيل ترجع الايام دى بس ممكن اوى تتكرر ))



زماااااااااان كنا صحاب



احمد قمر ( بولى ) عمرى ما عقلى غفل عن تذكيرى بمواقفنا سوا فى كل ركن فى بلدنا .. تخيل كل لما امشى فى مكان كنا فيه اشوفنا سوا قاعدين بنتناقش ووشنا فى وش بعض بالسعات ومش بنمل واشوفك ماشى هناك بتجرى عليا تشيلنى وتجرى بيا وأقولك احنا خلاص كبرنا وانت تقولى طول ما رجلينا شايلانا احنا لسه عيال سيبك انت .. وحشنى غضبك ووحشتنى ضحكتك نفسى نتصالح

(( عن الاسف..للأسف حدود .. ولكن اذا كان هو ده العائق فأنا هكسره ))




زماااااااااان كان عندى بيت



الوطن مش أرض وبس.. الوطن أرض وبيت وجيران وصحبه من يوم ميلادى لحد مماتى
مهما اتغير شكل بيتنا ومهما اتغير السكان فيه فهو لسه بيتنا بتاع زمان .. ومع ذلك كل لما اشوفه لازم اقول انا كنت ساكن هنا

(( ممكن تحن لاى مكان علشان بتحبه لكن مش اى مكان الروح تحبه ))




زمان كانت البراءه



كنا بنسمع حد بيقول ان اللى اكبر منك بيوم يعرف عنك بسنه ..زمان كان الشخص يفضل برىء ومالوش دعوه بمصاريف ولا اى شىء وقتها بنشوف البراءه ملحوظه وغير مقصوده لسه ماشلناش الهم . من النادر اننا نشوف براءه خالصه فى الايام دى ده حتى انا عمرى ما جادلت حد اكبر منى وانا صغير كان لما حد اكبر منى فى الشارع يعاكسنى كنت اضحكله واتكسف وامشى لانى طفل زى اى طفل فى سنى لكن دلوقت ما بقاش فيه حد صغير .. البراءه ليها اوقات معينه فى اليوم ..

(( احدثكم عن البراءه والخجل وإحمرار الوجه.. وعن نميجا الاطفال))




زمان ودلوقت عمرى ما هنساه

الحمد لله انفرد وسط كل اللى صاحبتهم بودى ليهم كلهم لحد دلوقت .. اى حد صاحبته فى حياتى لازم أحن ليه ويوحشنى اللقاء بيه فالمناقشه مع اللى تعرفه ويعرفك كويس زى معرفتك لنفسك بتبقى متعه اوى .. ووقتها مجرد الحديث بينكم إبداع غير مقصود .. وفعلا اللى مالهوش ماضى مالهوش حاضر

(( مضحكه ولكن لها معنى .... واحد طلع من هدومه ماعرفش يدخل تانى .. هههههه .. ))

.

.


فى لحظه من يومى ده حسيت انى بعيد عن التدوين ووحشتنى الكتابه والفضفضه وترجمه مشاعرى على ورق شجره مدونتى العزيزه


أأسف لنفسى على تقصيرى فى حق من احبهم

وأأسف ايضا على ما فاتنى من بوستات رائعه ولكن ملحوقه :)