الثلاثاء، 16 نوفمبر 2010

عن نفسى .. انا أقدر





هقدر



عن نفسى ..


انا هقدر...


هى كلمه كبيره .. عارف


بس ايه اللى هقدر اعمله ده مش مهم


المهم انى اقدر اعمل اى حاجه


صح او غلط ..


هنا الفرق


فى الصح والغلط


الاسهل والاصعب


وغالبا بيكون الغلط اسهل


ولكن بتفرق من انسان لغيره


مثلا انا اقدر افكر فى الشر كويس اوى


وأقدر اغضب اى حد لو كنت عايز


وأقدر احبب اى حد فيها


كل ده بالافعال والاقوال .. وكده يعنى


المهم اللى يقدر


.


يعنى مثلا انا قدرت احب وقدرت اوى كمان

.



قدرت ابعد عن نفسى مشاكل كتير جدا


وحلتها بكل حكمه


وسعات كتير بتبقى طالبه مشاكل


واتكلم واعمل حاجات مجنونه تخلى المشاكل كوارث


.


قدرت اشتغل وانجح فى شغلى


وقدرت كمان افشل نفسى فى كذا شغل



قدرت اصاحب ناس المفروض


انى ما اعرفهمش



لانى غير خالص عنهم



وكمان قدرت اضيع من ايدى صحاب



بندم عليهم لحد دلوقت


.


قدرت اعرف ناس .. تعتبر احسن ناس



وقدرت ابقى حاجه مميزه فى حياتهم


.


بس فى لحظه من حياتى ما قدرتش فيها اعمل اى حاجه

شفتها حبتها ..


بس كده


هى كده زى الخبطه


الشىء الوحيد اللى ممكن تعمله مع الخبطه انك تقول آه


كذلك المرحله دى


حبتنى حبتها دون اى خيارات


.


ودلوقت .. لقيت نفسى مع كل القدره اللى كنت بتمتع بيها زمان


بقيت مش قادر على حاجات كتير


فيه كلام كتير عاوز اقوله ومش قادر اقوله


حاجات بحلم بيها وسهل تحقيقها


ومش قادر


مش قادر استعيد صحاب زمان


مش قادر اتحمل الشغل اللى انا فيه لدرجه انى أهملته وسيبته


.

واللى بحبها .. مش قادر أحبها


بقه الشىء الوحيد المشترك بنا دلوقت


القمر و النجوم


.





جـــنـــانــ




بحبك و عارف إني بحلم إن ممكن في يوم تاخدني في صدرك تضمك عيوني يلمك جنوني تشدك آلامي و ياخدك سكاتي ياخدني هدوئك لبحر و زهر الشوارع إللي ساكن عينيك النعاسنين و لمسة حنانك جنانك في رسمة شفايفك وصوتك ملامحي في جرحي بحبك
و عارف إني بحلم إن ممكن تقوليلى بحبك ..بس أحبك نوقف ساعات الدقايق ثواني العقارب و نسكت و بس ..




مش قادر اتخيل نفسى من غيرها


اكتشفت ان الدنيا من غيرها ولا حاجه


وانها لما تكون معايا


بكون مش محتاج اى حاجه


عيونها وصوتها وخوفها عليا بقوا حاجه


وعرفت انى من غيرها ولا حاجه


وناقصنى الف حاجه وحاجه


هى الدنيا دى من غيرها تبقى حاجه ..؟!


بس هرجع تانى لنفسى واقول انا اللى قدرت اعمل كده فى نفسى


انا اللى بإيدى بسعد نفسى وانا اللى بحزنها لو قدرت





قلت أبص ف المرايا ..
يمكن أكون إحلويت ..
فضلت داير أبص ..
مخلتش ولا مرايا ف البيت ..
في الحمام ف الأودة ف دولاب ..
أو متعلقة ع الحيط ..
شوفت ..
سكت شويه ..
وبعدين إتخضيت ..
معقول أنا قضيت العمر ده كله ..
وزي ما روحت زي ما جيت ..!
معقول أنا عمري مافكرت ولا إتغيرت ولا حبيت ..!
وإزاي ساكت علي روحي ده كله ..؟!
وليه إستنيت ... !؟
يا ريتني ما كان عندي مرايا ..
..
..
..
وياريتني ما بصيت ..




.. رسمها علي سلامة .. وعشتها انا ..



وبعد كل هذا العناء


فشلت جميع محاولاتى فى ان اسمع عن وجودك شىء



هناك 8 تعليقات:

حلمى البعيد يقول...

أنا مش عارفا أقولك إيه بصراحه
لإنى عندى نفس الإحساس ده
لا قادره أقول لاء ولا حتى عارفا أقول أه لحاجه متمسكه بيها جدا

بس بجد والله وجعت قلبي بكلامك
حساس أوى وجميل
ربنا يسعدك ويخرجك من الحيره دى قريب
وكمان أنا مبسوطه أوى أوى
إنى أول تعليق
في أجمل عاصمه
تحياتى

جايدا العزيزي يقول...

اجدت التعبير

ولكن انا معك نستطيع ان نختار

ونقدر ان نحلم ونقدر كمان نحب

ولكن جايز نقدر نبعد لكن مش بسهوله

وده شئ اكيد

فشوق الحب لا يضاهيه لهيب

مهما ما كانت قسوته صعب كتير نقدر

رائعه وجميله جنات

تروقنى لاختيار كلماتها

دائما تدهشنى بتميزك وابداعك وانتقائك

شكرا لك

تحياتى

Admin يقول...

غلبتنى وعديت
وبوصفك لحالتى على خصوصياتى إتعديت
موال جرحك فى قلبى .. وده ظروف يا صاحبى
اه بايدينا نغيرها .. وبأيدينا نعمل وحياتنا إحنا اللى نختارها
لكن محتاج جهد وجد زى مقولتك
إنسى الامك ..شوف احلامك مهما عملت
ليك فى الدنيا لسه يا صاحبى مكان
لو فكرت فى مرة بأنك مُهمل يبقى جنان

بجد وصفت كتير من اللى جوايا
حسيتها يا احمد ويا ريتنى محسيت

شكراً ليك يا صاحبى
وجميلة خاطرتك

محمد التركى يقول...

السلامو عليكم

صاحبى وحبيبى
صباح الفل

جميل كلامك وجميل قوى انك تقدر تعمل كل ده
بس ليه تعمل اللى يخليك حزين وتعيس
طيب ما نعمل اللى يخلينا سعداء على طوال لو قدرنا

انا نت اول يوم عرفتك فيه وانا عارف انك شخصيه مختلفه
ذكى وراجل وجدع ومعندكش حاجه اسمها مستحيل
اه والله مفيش حاجه سألتك فيها وكنت متعرفهاش مثلا تروح تقولى عادى نعرفها حالا مفيش مستحيل
بجد انته شخصيه اللى يكون بعيد عنك هو اللى خسران

انته يابنى مش هشوفك بقى ولا ايه وام تليفونك انته غيرت الرقم من غير ماتقولى

على العموم انته اكيد هتوصل لحل اكيد
ربنا يارب يوفقك ياحماده يارب

تحياتى لشخصك الطيب

محمـــد التركـــى

ツSmiLeY AnGeLツ يقول...

السلام عليكم
كلنا زي حالتك لسه زي اما انا ماتغيرت من يوم ماوعيت على الدنيا وانا ولا حبيت ولاعرفت حد ولاتغير شي بحياتي
لكن في الاخير نرجع لربنا هو الي يخفف عنا احزانا والامنا
ربنا يوفقك وتعرف طريقك ولاتضيعه
لانه لو ضاع الطريق الصحيح عمرك ماتقدر ترجع ليه
ده يجي مرة بالعمر فلا تضيع عمرك بافعالك
تقبل مروري
سلامي ليك اخي.

عباس ابن فرناس يقول...

سعات كتييييييير

بنفتكر ان احنا اقويا

فى الوقت اللى بنكون فيه اضعف من ورقة توت

وسعات برضو بنعتقد ان احنا ضعفاء ومهزومين فى الحظة اللى بنكون فيها اقويا وحنا مش وخدين بالنا

بس المهم ان احنا نكتشف روحنا وفى الوقت المناسب
...........

بس قولى يا ابو حميد
انتا ليه بتسكت تسكت
وبعدين تروح منفجر زى البركان مرة وحدة ههههه
........

هتروق وتبقا عسل
انشاء الله

miroooo يقول...

السلام عليكم
كلامك اثر فيا كتير والله
فعلا بتيجى على الانسان لحظه يبقى مش قادر يعمل فيها حاجه بس بعد ما تمر الفترة دى اكيد هتقدر لازم تعمل حاجات تخليك سعيد ومبسوط دايما مع ان فى لحظات كتير بنمر بيها بتخلينا مش قادرين نفكر وبنبقى كمان مش عايزين نفرح بيبقى الحزن غالب علينا بس كله بيعدى
بس فى الحب بقى طالما قدرنا نحب مش لازم ابدا نضيع اللى بنحبه من ايدينا بكل سهوله وبارادتنا اى نعم فى ظروف بتمنعنا ان احنا نكون معاه بس لمش لازم ابدا نفرط فيه مهما كانت الاسباب

اتمنى لك طبعا السعاده من كل قلبى
معذرة لو كنت اطلت عليك
تحياتى

ahad يقول...

صباح الخير ياأحمد

أزيك و كيف الشتويه معاك ؟؟
عارف أنا ضيعت سنيييييين أفكر بأشخاص مايستاهلون وأعدي لهم واحب بضمير
عارف لما تيجي على كرامتك وتسكت
وكان عذري أن أنا مااقدر أسيبهم
بس اليوم تفكيري أختلف وصرت ألوم نفسي
انا الي كنت بوهم نفسي انا ماأقدر
ونفسي الوقت يرجع وأغير اشياء كثير
حط في اعتبارك ياأحمد الشخص الي مايقدرك بنفس مستوى تقديرك له وما يعتبرك مهم بنفس مستوى اهتمامك فيه ربنا يسهل له
عشان ماتندم بعدين وحاول دائماً تنسحب في أقرب وقت عشان تطلع أما ربحان أو بأقل خساير ممكنه..
وماتتهاونش في قلب حبك وقف معك بجد
انتقي الأشخاص الي يسكنون قلبك بحرفنه ومهاره عاليه حتى لايخرجون منها
أنا بمجرد قرار أتخذته رميت أشخاص كانوا لسنوات متصدرين قائمة ال vip عندي الى سلة المهملات لأني فقط وثقت بأنني أستطيع
صدقني بحكم اني مجربه ..كلنا بنقدر
لما نكون عارفين أننا بنقدر
وانت بتقدر ياأحمد

ربنا يوفقك ويشرح صدرك يارب

صديقتك ..
عهد