انسان .. مرتجع .. وحجات شبه الكلام

وحشتني المدونة .. بقاالي كتير ما كتبتش .. و كل لما آجي وأزور صفحتي ..
و أقول هاكتب .. مالقيش حاجة أقولها ..

ولا حاجة احكيها ..

قولت ممكن تكون فترة و هاتعدي ..

لكن للأسف استمرت و مازالت مستمرة .. و مش قادر احدد السبب ..

الحياة .. حياة طويلة و مملة و كئيبة ..
حتى عقارب الساعة بتلف في مركزها بهدوء البائسين ..

الناس .. الناس رسمت الحياة على ملامحهم بالتراب الأسود و التلج ..
و تشوفهم كل يوم نسخة بالكربون عن اليوم إللي قبله ..

أنا .. أنا بضحك على الناس و على نفسي بابتسامات و كلمات باهتة و مالهاش معنى ..
و يفضل سر الحاجة الناقصة سؤال مالوش إجابة عندي غير الصمت ..

هاتكلم عن ايه ؟؟

هو إنتوا مش عارفين ؟؟

مش عارفين إن العمر بيجري من ايدينا و إحنا مش حاسين ؟؟

مش عارفين إن الحب بيعمل المعجزات ..
و احنا دلوقتي في زمن المعجزات من غير حب ؟...

مش عارفين إن طاقة النور إللي بتدور عليها .. دايما بندور عليها عند كل الناس ..

و بننسى أول واحد ندور عليها عنده .. هو إنت ؟؟مش عارفين إنك مهما دورت على ايد تطبطب عليك و إنت محتاج مش هتلاقي احن من ايديك على نفسك ؟؟

الدنيا دي عجيبة أوي .

.أحكيلكم عن ايه ؟؟؟ ماهو بقى لكل حاجة في الدنيا لسان يتكلم عن نفسه ..
أحكيكلم عن ايه ؟؟؟

ما احنا حافظين معادلات الدنيا كلها و بنحل كل مرة غلط ..

بس عارفين ..

برغم المساحة الواسعة من الصمت الأسود في يومي ..

إلا إن عندي أمل ..

الحمد لله ..

مش هاطول عليكم ..

بجد وحشتوني ..

وما تخافوش

انا لسه معترف بالحب

اللى هو الحب الحب ..

مش اللى كده وكده

مش حب التليفونات للصبح ولا المقابلات ولا الهدايا اللى ليها لازمه واللى مالهاش

الحب .. الحب ده هو اول دليل على الحياه السعيده

اول عتبه فى الحياه المستقره

مش الاكتفاء بالحاجه وخلاص

الناس شايفني قوي .. و انا أغلب من ريشة نعامة يتيمة ...
الناس شايفاني مصدر دفا .. و انا شعاع شمس من تحت غيم مليان مطر يكفيني للدفا..
الناس شايفاني وكيل الطاقة لكل المحيطين .. و انا في أمسّ الحاجة لنظرة حب عابرة تطمني
..
على فين ؟؟
الطريق مافيهوش إشارات ؟؟ و الإشارات على حسب إللي بيعدي ..
و انا مش عارف انا شوفت صح ؟
طب فهمت صح ؟ طب هي فعلا إشارة ؟
..
طب على فين ؟؟
انا بحب أوي .. و مش عارف إذا كان دي ميزة ولا عيب ..
هو مين إللي بيحدد مسار النهر إللي جاي من الشلال ؟؟
قوة الماية المندفعة من فوق ؟؟
ولا اختيار الأرض ؟؟
هو ممكن العطشان يرتوي بحقن ماية عذبة تحت الجلد ؟؟
هو الحب لو مكنش كده ؟؟ يبقى اسمه برده حب ؟؟

شعور الوحدة ده حاجة صعبة أوي ..
و الأصعب منه إنك تكون وسط الناس ..
تخيل إنك تكون واقف على مسرح .. و شايف إن الحضور مستمتع جدا بكلامك المؤثر
و إنت سعيد .. و بتقول من قلبك أحسن ما عندك ..
و بعد ما خلصت ..
و نور المكان اختفى ..
اكتشفت ..
إنك تكون بتحاااضر للكراسي ..
و إنك شوفت ضهور الكراسي روؤس ناس ..

بس عارفيين

اللى بيتبع اثار الاقدام مش زى اللى ماشى بيقين

وكمان انا لسه عندى قرارى

سأظل نجماً عالياً

سأظل قلباً راضيا

سأظل دوماً باقياً

أقدم عاصمه فى الحب