الخميس، 30 أبريل 2009

فشل على مرمى البصر

ما ابشع كلمه فشل ويا سلام بقه انت لو قاعد مع حد فاشل على الاخر حياته لا حول ولا قوه الا بالله (( متدمره ))
هذا الحوار من شخصين انا الطرف المستمع بس وصديق قديم لى هو الطرف الثانى اخذ يسرد لى مواقف عديده قد مر بها فى حياته وكيف هى حياته الان وكنت استمع له بكل تمعن والله يا جماعه انا عينى رغرغت من الدمع المتعلق فيها بسببه بجد بلدنا بقت قاسيه كده على ولادها
معقوله فى كده بجد مش عارف بقه بس الكلام ده بيقول كده ::-

الفشل دى كلمه وحشه اوى يا احمد
ويا سلام بقه لما يكون حد عايشها
بتموت الكلمه دى بجد
اكتر حاجه توجع فى الكون انه يكون حد معترف بنفسه انه فاشل
ولو للحظات لو بس شك فى نفسه انه غلط ا انه مش عارف يحكم نفسه بنفسه انه لازم يكون عليه رقيب ولازم يكون حد متابعه او رئيس عليه ولو مافيش الحد ده هتبقى حياته كلها غلط فى غلط هيبقى عايش ومش عايش يعنى مالهوش لازمه واصلا اصلا مافيش حد ينفع رئيس على حد كل واحد عايش لنفسه بس ماعدش حد بيعيش لحد يا احمد بعد الاب والام خلاص مافيش اى حاجه حتى انا مافيش يا احمد والله
انا نجحت فى حياتى فى المدرسه بس وده سببه المتابعه الابويه اللى كنت فيها اللى كانت بالنسبه لى نعمه كبيره اى حد يتمناها ولما جه الوقت واعتمدت على نفسى بعد ابويا وامى القى نفسى تحت تحت او يمكن تحت دى كلمه صغيره حطمت نفسى بنفسى شويه بوهم اسمه الحب وكانت عواقبه صبيانيه سازجه غيرت مجرى حياتى تماما مافيش حاجه فى حياتى متغيرتش كل حاجه كل حاجه اهلى اللى كانوا بيحبونى دلوقتى بيتلاشونى وحبيبتى اللى كنت بحبها بعدت عنى ومش عاوزانى واصحابى اللى كنت بخلصلهم خلاص ضاعوا منى خسرونى علشان ولا حاجه حياتى كلها اللى كنت بحلم كتير فيها بكذا وبكذا كلها اتغيرت حتى الحاجه اللى كنت بقول مستحيل انها تضيع منى ( مهاراتى فى فن الكرايته) ضاعت هى كمان بسبب ظلم اتنفذ فيا بدون اى سبب واتوقفت عن اللعبه كتير علشان انا فى دوله محترمه لا تتبع الهمجيه والاستهتار ومالهاش دعوه بالعاواقب النفسيه الناتجه عن افعالها وافعال الفاسدين فيها المهم ان القانون ياخد مجراه وماحدش له دعوه هل القانون ده نازل من السما ولا ايه ظروفه ماحدش يعرف بقه هما بس اللى يعرفوا ... ولما مر الزمن بيا وجتلى الفرصه انى اتغير وابقى صح ولو مره انا اللى اكون عاملها بأيدى تقريبا فشلت تانى اتفصلت من الكليه ودخلت التخشيبه اكثر من مره فقط علشان بتمشى بالليل انا واصحابى نضحك ونهزر فى الشارع (( انتوا منين ياد انت وهو ....؟بتعملوا ايه هنا.....؟ شغاليين ايه .....؟ اللى هشوفه هنا تانى هعمل وهخلي فيه وفى اللى جايبينوا ....؟ )) واذا حد رد ياخد على قفاه ويتجرجر على القسم ويتظبط اخر حاجه بيعملوا الواجب صراحه يعنى مع الواحد . انا مش متخيل ان البلد دى فى يوم من الايام هطلع حد ينفع بلده . تقريبا كده يعنى بلدى كلها فاشليين كلها كلها يعنى مافيش حد نص نص او حد يمكن ينجح لالا كلها فاشلين ومستقبلنا غير مرغوب فيه لان احنا طبعا عارفينه .
هذا الكلام منقول من على لسان شاب يئس من الحياه فى بلدنا المتوحشه (( كــفــر الـــدوار )) الموزعه الاولى لمصر من منتجها المشهور (( الشباب الضائع الذى يحمل كل الصفات الخبيثه ))
ربنا يسترها علينا احنا كمان و يحرس كل شاب فى مصر يحرس مجال خليك فى حالك بالاخص علشان انا بحب اصحابى اوى
افرح
انسى....ولو شوية
امحى حروف الخوف
الحزن عمره ما طرح
افرح انسى الظروف
تلضم حروف
كلمة فرح
افرح
يا اللى الفرح ليك
بقى بتمن
والضحك سابك
وهاجر من زمن
افرح
كتبها زيفاجو
ووقع عليها بالتعجب احمد

ليست هناك تعليقات: