موعد غرامى خالى من الشوائب

كل حاجه فى وقتها لها طعم تانى اللى هو طعمها الاصلى اللى احنا بنتلهف عليه وممكن نستعجل فى عمله

امسك اديكِ ممكن ..؟

لا طبعا انت تحمد ربنا انى قابلتك من اساسه ..

ليه انتى مش كنتيش عاوزه تقابلينى ..؟

لا كنت عاوزه اقبلك طبعا بس فى نفس الوقت ما كنتش عاوزه اقابلك...

ودى تيجى ازاى يعنى .. وليه وافقتى طيب وجيتى من اساسه..؟

لان رغبتى فى مقابلتك كانت اكبر ..

اممممم طيب ... وليه ما كنتيش عاوزه تقابلينى ..؟

لانى حاسه انى خاينه ..

نعم ..؟ خاينه ..؟ أزاى يعنى ...؟

ماما مش تعرف انى قابلتك ..

طيب ما هى هتعرف فى الوقت المناسب ..

مش متعوده على كده

طيب بحبك ..

ماشى

اجيلك البيت ازاى ...؟

بص انت تمشى كده وبعدين تدخل يمين و...

استنى بس .. انا مش اقصد كده انا عاوزك تترجمى مشاعرك لكلام علشان حجات كتير كده منها اقدر ادخل البيت ..
لا مش هعرف ..

انا اعلمك ..

والله ...؟ واحنا ناويين نطول فى القاعده دى مع بعض ..

عاوزه تمشى دى ولا ايه ...؟!

.....*.....*.....*.....

صمت ... خجل

نظرات قصيره .. ابتسامه رقيقه جدا جدا

وجمال البسمه انى شفتها على قرب نصف زراع

اهديتها ورده بامبى صغيره

واهدتنى هى قطعه من الشكولاته كبيره الحجم من النوع اللى بفضله

مَا تِطْـلُبيشْ مِنِّي السكوتْ..

وسط الكلام.. بِاسْم الخجلْ

خَـلِّـينِـي افَـضْـفَـضْـلِـكْ لامُـوتْ..

وِ العِشْق مِنُّه مَا قَتَلْ

وِ انْ كُنْتِ مَالْكِيشْ احْتِمَالْ..

أَجِيب انَا منين احتمالْ..

وِ انْتِ الخَجَلْ زَادِكْ جَمَالْ..

و زَادْنِي لَهْـفَـة لِلْـغَـزَلْ

***

صُوتْ شَفَايْفِكْ..

زَي صوت الهَمْهَمَاتْ..

لما تخرج مِـ الوَدَعْ..

شَايْلة نِسْمِةْ بَحْر فاتْ

وَ ابْقَى شَايْفِكْ..

و العينين تايهة فْـ شَتَاتْ..

بين تَصَاوِير البِدَعْ..

و بين تَسَابِيح الآيـَاتْ

شِيلِي إِيدِكْ..

مَا تْدَارِيشْ عَنِّي العينين..

هَاسْكُتْ خَلاَصْ

حَتَّى الكلام مِنُّه مَافِيشْ فايدة..

وَ انَا حَوَالَـيَّـه نَاسْ

لَـكِنْ و انا بِعينَيَّ شَايِفْ..

بِيْفِيضْ هَوَايَ بِالشَّـفَايِفْ..

وَ انَا فِي الكَلام بَانْسَى القُـبَـلْ

وِ انْ كُنْتِ مَالْكِيشْ احْتِمَالْ..

أَجِيب انَا منين احتمالْ..

وِ انْتِ الخَجَلْ زَادِكْ جَمَالْ..

و زَادْنِي لَهْـفَـة لِلْـغَـزَلْ

***

شُـوقْ عِينِيكِي..

غِنْوَة مَالْهَاشْ غير سُكَاتْ..

وَ امَّا يِطْرِبْنِي السَّمَعْ..

بَانْتِشِي بِينِ الآَهَاتْ

و اللِّي فِيكِي..

لسَّه مِنْ طَبْعِ البَنَاتْ..

ضِحْكَة مَلْفُوفَة بْدَلَعْ..

لَوْ عَلِيكِي قَلْبِي مَاتْ

عَايْزَانَا نِمْشِي ؟

خلاص نِقُومْ..

طَبْ هَاتِي إِيدِكْ بِينْ إِيدَيَّه

هَامْشِي أَبُص انَا لِلنُّجُومْ..

وَ ابْعِدْ بِعِيدْ خَالِصْ عِينَـيَّه

عَشَان وَ انَا وِسْط الطَّرِيقْ..

مَا الْمَحْشِ بَعْدِكْ أَيّ شِيءْ

بِتِضْحَكِي .. طَبْ إِيه العَمَلْ

انْ كُنْتِ مَالْكِيشْ احْتِمَالْ..

أَجِيب انَا منين احتمالْ..

وِ انْتِ الخَجَلْ زَادِكْ جَمَالْ..

و زَادْنِي لَهْـفَـة لِلْـغَـزَلْ

مَا تِطْـلُبيشْ مِنِّي السكوتْ..

وسط الكلام.. بِاسْم الخجلْ

خَـلِّـينِـي افَـضْـفَـضْـلِـكْ لامُـوتْ..

وِ العِشْق مِنُّه مَا قَتَلْ

.

.

.

.

.

.

.

كتبها أحمد صلاح حماد ووقعت انا عليها بالاعجاب