لا مافيش حاجه

ماحدش جاى يا قلبى متستناش

ومن وهمك فوق ده بعدك عاش

جاى يقولك انسى وانت مابتنساش..؟

اهو حُبك عنده يا قلبى هان

وفاتك وحدك من غير علشان

وعاوز تستنى يا قلبى كمان..؟

اصحى ومن وهمك فوق

زى ما عشت معاه فى الشوق

حالف من غدره لازم تدوق

وماحدش جاى يا قلبى ماتستناش

.
.

فاتت احلى ايام حياتى فاتتنى الفرحه والضحكه فاتنى الامل اللى كنت بشقى واعرق واجتهد واسعى علشانه فاتنى حب ناس كتير ضيعته علشان واحده ... ايوه صح هو ده التعبير الصح .. واحده ..

واحده حبتنى اوى اكتر ما انا حبيتها بس اى حد ممكن يتغير

وسهل اوى اى حب ينتهى وكمان من غير اى اسباب ولو كان فيه اسباب تبقى اسباب كويسه هى شافتها حاجه تانيه

كده يا دنيا اتنين

اتجرحت فيكى مرتين

مشفتش فرح اد ماكنت حزين

مره علشان مش عارف مين..؟
والمره دى ضاعت احلى سنين

.

طيب والله كان عندى احلام جميله اوى كان نفسى احققها معاها كنت بحلم بأرض ونبنى سوا عليها بيت تلات ادوار دور لينا ودور لأبننا ونعمل مشروع الكمبيوتر اللى كنت بحلم بيه تحت البيت وانتى تشتغلى فى مدرسه قريبه وانا اشتغل شغلانه فى الحكومه فى مكان قريب من البيت ونعيش احلى حياه زوجيه فى الدنيا

يمكن علشان الاحلام دى انتى قررتى ان العلاقه تتنتهى ..؟

يعنى مثلا كنتى بتحلمى انى ادلعك قبل ما اخطبك ..؟ بمعنى انى اخرج معاكى كل يوم او اتصل بيكى كل شويه ...

يمكن يكون كده بس انا عمرى ما كنت هعمل كده قبل الخطوبه عمرى فعلا ما كنت هعمل كده لانى مش عاوز العلاقه اللى بينا تنتهى لان كتر المقابلات والاتصالات والعلاقات بتخلق مشاكل احنا او انا ما كنتش اتمناها . وكمان انا كده بخون ثقه اهلى ويمكن نسبه الخيانه كانت هتكون عندك انتى اكتر . انا بحب اختى اكتر من اى حد وعارف ومقتنع ان (( كما تدين تدان )) وعلشان فاهم الكلمتين دول انا مش عاوز اتعمق فى العلاقه معاكى الا لما نتخطب لبعض ..

عموما خبطتين فى الراس بتوجع وبتعلم كمان وبتقسى وبتنسى وبتسيب أثر كبير

وبنخرج من الحاله دى بدروس فى كيفيه التعامل مع الحياه التى بهذا الشكل

.

فى الاخر حاضر هنفذ طلبك مادومتى انتى اللى طلبتى

حاضر هعتبر انه مافيش حاجه حصلت

وحاضر هحاول انسى

وماتخافيش انا مش زعلان ولا حاجه

وماتخافيش انا مش مجروح ولا حاجه

((بكدب طبعا))

واوعى تشغلى بالك وتقولى انك زعلانه انك قولتى كده

اللى حصل حصل خلاص

وفى اخر الاخر ما أحبش اقول

(( مشوارنا انتهى ))