الكمال لله وحده

حقاُ وصدقاً لا اله الا الله

والكمال لله وحده

سبحان الحى الكامل زو الجلال والاكرام

.

مافيش حاجه كامله فعلا لازم فى كل حاجه ميزه وعيب لازم نلاقى فى أى شىء ربنا خلقه حاجه مش موجوده لحكمه ربنا وحده اعلم بيها

اللى أتولد وحيد ومالهوش اخوات صبيان بيبقى فرحان اوى لما يجى عليه الدور فى أداء الخدمه العسكريه ( :

وبيكون فى نفس الوقت حزين جدا لانه كان نفسه يبقى له أخ يحبه ويخاف عليه

نفس حالتى كده

كان نفسى بجد يبقى ليا أخ أصغر أو أكبر منى المهم يبقالى أخ شقيقى من لحمى ودمى

حاكم اليومين دول قليل اوى اللى تلاقيه اخ بجد ولو لقيته مش هيتوفر فيه كل الصفات اللى هتلاقيها فى اخوك شقيقك

ده حتى الواحد أول لما بيتخبط او بيسمع خبر وحش بيخبط على قاصرته ( بدايه الرأس ) واول حاجه بيقولها أخ

حكمه ربنا سبحانه وتعالى فى كده

انا مش معترض ولا حاجه بس كان نفسى فعلا يكون ليا شقيق وتحتها مليون خط علشان فيه فرق كبير اوى بين الصاحب اللى بنقدره اخ وبين الاخ اللى هو الشقيق ابن أمى وأبويا

.

.

.

وعن الوطن اللى الناس كلها زعلانه منه ... والله مافيش حاجه كامله والقانون ده بيطبق على الوطن كمان

وكمان مش علشان هو ناقص حجات كتير نكرهه او بلاش الكلمه دى خليها زعلانين منه ... مثلا انا سمعت حوار مش فاكر فين بس هو تقريبا فى التليفزيون بين اتنين واحد بيسأل واحد بيقله (( انت مش بتحب مصر ليه قاله كده يا عم هى فيها ايه يتحب قاله طيب انت بتحب أمك قاله ايون قاله بتحبها علشان هى امك مش علشان هى اجمل واحده فى الدنيا او علشان هى احسن واحده فى كل حاجه بتحبها لمجرد انها امك قاله صح فرد عليه وقاله كذلك وطنك لازم تحبه لمجرد انه وطنك اللى هو مش كامل ))

اللهم احفظنا من الحروب ومن المجاعات وانتشلنا يا رب من وسط الفاسدين المنافقين المدعين حبهم لوطنهم

اللهم آمين

.

.

.

كمان لو واحد بيحب بنت ما يزعلش لو خلفت ظنه فى طبع او فى صفه او فى عاده او فى اى شىء

يعنى انا لما الحب أ ُفترض عليا (لانه طبعا مش قرار بناخده) وقتها كان نفسى اللى حبيتها تكون البنت اللى رسمتها فى خيالى وفضلت أفتش على الامنيات اللى أتمنتها فيها وفى الاخر مالقتش كل حاجه ... مثلا كنت اتمنى انى اكون اول واحد فى حياتها وفعلا كنت أول واحد وكمان التالت ههههه فهمتو طبعا انها كانت بتغظينى فى وقت اختلاف بينا.. ما علينا

وكمان اتمنيت انى اشوف عندها الصبر الطويل ولقيته بس مش طويل اوى ومقابل قله الصبر ده لقيت التسامح والتراحم والوصل والحب والذكاء والحنان واللهفه ( بتكلم عن اللهفه اللى بنقراها فى العيون )

.

.

خلاصه الكلام حسيت النهارده بالنقص فى حجات كتير

عندى صحه ومش وسيم

ذكى بس ماعنديش حظ او ماجتليش الفرصه

مش غنى اوى بس مستور الحمد لله

ماعنديش اخ صبى بس مش هدخل الجيش

عصبى جدا جدا بس الناس بتقول عليا فكاهى واجتماعى

ولذلك انا احمد الله على كل شىء .

وكما قال أحدهم (( الرضا مفتاح السعاده ))