مش هدخل الامتحان

شكلها هتبقى دى نهياتى المأسويه

.

.

من كام يوم حاولت اخلص ورق الجيش بتاعى علشان انا متخلف دفعه وكمان عاوز اعمل ورق الجيش علشان مش هدخل الامتحان من غيره ( شرط غريب من وزاره التعليم العالى فى حق التعليم المفتوح ) المهم لما حاولت اخلص الورق.. الست الفاضله اللى فى السجل المدنى قالتلى اعمل كشف عائله علشان انا مش ليا جيش علشان مش ليا اخوات صبيان ولما سحبت الورقه ومليتها كان فيها كام خانه مش فاهم اكتب فيهم ايه فرُحت لها وقلتلها اعمل ايه فقالتلى وهى مترفزه اوى.. يا ابنى انت اكتب هنا كذا فكتبت كذا ولما كتبت رجعتلها قالتلى.. انت مالك فيه ايه اكتب هنا كمان كذا وكتبت هنا كمان كذا ولما رجعتلها قاتلى ورقك ناقص هات صوره قسيمه جواز والديك فجريت على البيت واخدت القسيمه وصورتها ولما رجعت كان السجل قفل فأنتظرت لتانى يوم ولما رحتلها تانى قالتلى انت عامل حجات غلط فى الورقه فسحبت ورقه غيرها وسألت شاب كويس وقالى الصح ايه ولما خلصت الورق قالتلى كده كده ورقك مش هيسافر الا يوم الاربع يعنى كمان اربع ايام وهاتيجى تاخده كمان اسبوع من ميعاد التسليم فقلت ماشى اسبوع كويس علشان انا همتحن كمان عشره ايام ..

وانا راجع للبيت قولت اجرى على التعبئه وأسألهم بعد لما اجيب كشف العيله هاخد موقفى من التجنيد امتى قالولى بعد ميعاد تسليمك ليه بخمستاشر يوم .. وكانت هى دى الصدمه انى اكتشفت ان الورق هيخلص بعد الامتحانات وانا بكده مش هدخل الامتحان

مش عارف اعمل ايه ... السنه هضيع عليا بسبب الناس اللى هما المفروض بيخدموا الشعب ولكن هما اللى بيعطلوا الشعب كله ومش عارف النرفزه بتاعتهم دى ليه وكلامهم اللى بيحسسك انك بتطلب منهم حسنه يمكن تكون اللى كنت بكلمها دى جوزها مغضبها قبل ما تيجى شغلها ولا ايه.. مش عارف بقه

بس اللى عارفه انى مش هدخل الامتحانات وهتعقد من التعليم كله اللى ماليش فيه حظ

سنتين فى معهد فنى تجارى ... اول سنه ماكنتش هنا وكنت بشقى علشان عاوز اخطب ولما مشروع الخطوبه فشل رجعت وقلت اكمل التعليم ولما بقه رجعت.. الله يسامحه رئيس اللجان هو اللى نرفزنى وخلانى اضربه فى عنيه وأورمهالوا وبسببه اخدت ملفى من المعهد بكل بساطه ولما قدمت تعليم مفتوح مراكبى وقفت لحد السجل المدنى وورق الجيش ..

انا مش عارف فيه ايه بس هو فيه حاجه غلط فيا وخلاص ومش عارف هى ايه ...؟!

شكل مستقبلى باين اوى قدامى وحاسسه من قبل ما ابقى فيه ...

ربنا يستر..